ልደት

ሥርዓተ ነግሥ:-

ስምዓኒ እግዚኦ ጸሎትየ፡ ሃሌ ሉያ ሃሌ ሉያ፡

ወይብጻሕ ቅድሜከ ገአርየ፡ ሃሌ ሉያ

ሃሌ ሉያ፡ ወኢትሚጥ ገጸከ እምኔየ፡

በዕለተ ምንዳቤየ አጽምእ እዝነከ ኀቤየ፡ ሃሌ ሉያ

ሃሌ ሉያ፡ አመ ዕለተ እጼውአከ ፍጡነ ስምዓኒ፡

ሃሌ ሉያ ሃሌ ሉያ፡ ለዓለም ወለዓለመ ዓለም፡

ሃሌ ሉያ ዘውእቱ ብሂል፡

ንወድሶ ለዘሃሎ እግዚአብሔር ልዑል፡

ስቡሕ ወውዱስ ዘሣረረ ኲሎ ዓለመ፡

በአሐቲ ቃል።

–

እስመለዓለም:-

ተወልደ ኢየሱስ በቤተ ልሔም ዘይሁዳ አዋልደ ጢሮስ አሜሃ ይሰግዳ ሰብአ ሰገል አምጽኡ ሎቱ ጋዳ ወይትኃሠያ አዋልደ ይሁዳ

–

ምልጣን:-

ሃሌ ሉያ፡ ዮም ፍሥሓ ኮነ፡ በእንተ ልደቱ ለክርስቶስ፡ እምቅድስት ድንግል፡ ውእቱ ኢየሱስ ክርስቶስ፡ ዘሎቱ፡ ሰብኣ ሰገል፡ ሰገዱ ሎቱ፡ ኣማን፡ መንክር ስብሓተ ልደቱ።